1344 August 29. Brieg

Erneuerung des Biermonopols.

In nomine domini amen. Nos Bolezlaus dei gracia dux Slesie et dominus Legniczensis recognoscimus universis, quia, quamvis consulibus, civibus et universitati civitatis nostre Brege dedimus aliquo tempore precedenti vel dicte civitatis Brege utilitatem, commodum et profectura, quod nulla cervisia aliunde allata deberet ibidem in Brega propinari, prout in litteris nostris antea confectis super huiusmodi negocio plenius continetur, nichilominus tamen ad certitudinem maioris efficacie et perpetui vigoris iterato damus ex nostra gratia ducali et concedimus ex novo nostris literis confirmando eandem donacionem seu ius municipale videlicet, quod de cetero cervisia Swydeniczensis nec aliarum civitatum quarumcunque seu aliunde allata non debeat ibidem in Brega quovismodo propinari vel usu propinationis vendi, sed Bregensis cervisia tantum. Sed si aliqui cives nostri Bregenses cervisiam de aliis civitatibus seu locis pro usu domus sue et suis amicis ad bibendum et non propinandum adduxerint in Bregam, eos bene decet atque libet; preterea dantes etiam predictis consulibus et civibus nostris predictis plenam potestatem et omnimodam facultatem, si aliquis ex nostris officialibus, decuriis vel aliis personis, cuius condicionis, status aut dignitatis extiterit, ad propinandum cervisiam aliunde allatam ibidem in Bregam adduxerit, concuciendi, frangendi et adnichilandi vas cervisie et ipsam cervisiam pro utilitate et voluntate ipsorum faciendi, prout ipsis videbitur expedire. In cuius rei testimonium presentibus nostrum sigillum est appensum. Datum in Brega quarto kal. Septembris Anno domini MCCCXXXXIIII, presentibus nostris fidelibus Johanne Knuwir, Gunthero de Pogrella, Dirsone Mrokot, Borutha de Stanschow militibus, Bertoldo Schenke, Henrico iudice curie Bregensis et Gerlaco nostre curie notario, qui presencia habuit in commisso.

An rothseidener Schnur das Reitersiegel des Herzogs wie bei No. XXIII.
In deutscher Uebersetzung, jedoch nicht vollständig bei Glawnig, Brieger Wochenblatt V. 265.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 9, Urkunden der Stadt Brieg. Urkundliche und chronikalische nachrichten über die Stadt Brieg, die dortigen Klöster, die Stadt- und Stiftsgüter bis zum Jahre 1550. Hrsg Dr. C. Grünhagen, Breslau 1870.